普通市民環遊世界 1

普通市民環遊世界 1 – 2015年我們決定環遊世界                     作者：聰LA! 衝啦!

2015年1月頭，你突然同我講不如去環遊世界，聽到果刻我呆咗以為你講笑。你話剛剛聽完茜加航空一個關於環遊世界既訪問，發覺自己有相同感受 – 做咗咁多年野都無停過俾自已真正休息下，希望比時間自己諗下自己為乜不停咁做；慨嘆無論搵幾多都好係香港儲錢根本買唔到樓，追唔到佢既瘋狂升幅，倒不如拎啲錢出嚟去旅行，一來去沈澱一下自己，諗諗自己既方向，二來去增廣見聞、見識世界。 嘩！我從來無聽過以慳錢為上嘅你會有所頓悟，仲要係辭職去旅行，簡直係匪夷所思。似乎斯里蘭卡嘅工作經歷真係好唔一般。

斯里蘭卡工作?!

2014年4月，你任職4年既公司架構不停轉變，於是開始另謀高就，喺無幾耐你就搵到新既工作並辭咗工作咗4年既公司。點知忽然又同時收到另一間環球酒店公司嘅面試機會，喺面試過程間又無意地發現有個赴斯里蘭卡海外工作既機會，於是你就打電話俾我討論海外工作嘅問題，我二話不說就叫你答應。對我來說，不同地方、國家嘅工作機會是人生的新嘗試，特別係由畢業都一路在香港工作既你，跳出固有框框比起任何事情更有趣、亦係挑戰自己、放眼目光既好機遇。 於是我地喺2014年5月開始準備移居到斯里蘭卡。